നിങ്ങളുടെ കയ്യിൽ യെസ് ബാങ്കിന്റെ ഫോറെക്സ് കാർഡ് ഉണ്ടോ? എങ്കിൽ ജാഗ്രത പാലിക്കുക. ബാങ്കിന്റെ മൾട്ടി-കറൻസി കാർഡുകൾ ഉപയോഗിക്കുന്ന അയ്യായിരത്തോളം ഉപഭോക്താക്കളുടെ അക്കൗണ്ടുകളിൽ നിന്ന് കോടിക്കണക്കിന് രൂപ അജ്ഞാതർ തട്ടിയെടുത്തു. ഒടിപി പോലും ഇല്ലാതെ വിദേശ രാജ്യങ്ങളിൽ നടന്ന ഈ വൻ സൈബർ കൊള്ളയെക്കുറിച്ച് ബാങ്ക് ഇപ്പോൾ ഔദ്യോഗിക സ്ഥിരീകരണം നൽകിയിരിക്കുകയാണ്. എന്താണ് യഥാർത്ഥത്തിൽ സംഭവിച്ചത്? നിങ്ങളുടെ പണം സുരക്ഷിതമാണോ?
വിദേശയാത്രകൾക്കും മറ്റും ഉപയോഗിക്കുന്ന യെസ് ബാങ്കിന്റെ മൾട്ടി-കറൻസി പ്രീപെയ്ഡ് ഫോറെക്സ് കാർഡുകൾ വഴി 2.55 കോടി രൂപയുടെ അനധികൃത ഇടപാടുകൾ നടന്നതായി ബാങ്ക് സ്ഥിരീകരിച്ചു. ഏകദേശം 5,000-ത്തോളം ഉപഭോക്താക്കളെയാണ് ഈ തട്ടിപ്പ് ബാധിച്ചത്.
എന്താണ് സംഭവിച്ചത്?
ലാറ്റിൻ അമേരിക്കൻ രാജ്യങ്ങളിലെ ചില വ്യാപാരികൾ വഴിയാണ് ഈ തട്ടിപ്പ് നടന്നത്. 2026 ഫെബ്രുവരി 24-ന് പുലർച്ചെ 3:30-നും 8:30-നും ഇടയിലായിരുന്നു മിക്ക ഇടപാടുകളും. പല വിദേശ രാജ്യങ്ങളിലും ഓൺലൈൻ പണമിടപാടുകൾക്ക് ഇന്ത്യയിലുള്ളത് പോലെ രണ്ട് ഘട്ടമായുള്ള സുരക്ഷാ പരിശോധന നിർബന്ധമില്ലാത്തതാണ് തട്ടിപ്പുകാർ മുതലെടുത്തത്.
ബാങ്ക് നടപടികൾ
സംശയാസ്പദമായ നീക്കങ്ങൾ ശ്രദ്ധയിൽപ്പെട്ട ബാങ്കിന്റെ സെക്യൂരിറ്റി സിസ്റ്റം ഏകദേശം 91 ലക്ഷം രൂപയുടെ ഇടപാടുകൾ തടഞ്ഞു. തട്ടിപ്പ് നടന്ന ലാറ്റിൻ അമേരിക്കൻ രാജ്യങ്ങളിൽ നിന്നുള്ള ഓൺലൈൻ ഇടപാടുകൾ ബാങ്ക് താൽക്കാലികമായി നിരോധിച്ചു. ചതിയിൽപെട്ട ഉപഭോക്താക്കൾക്ക് സാമ്പത്തിക നഷ്ടം ഉണ്ടാകാതിരിക്കാൻ 'ചാർജ്ബാക്ക്' നടപടികൾ ആരംഭിച്ചതായി യെസ് ബാങ്ക് അറിയിച്ചു.
ഉപഭോക്താക്കൾ ശ്രദ്ധിക്കാൻ
നിങ്ങൾ ഇത്തരം ഫോറെക്സ് കാർഡുകൾ ഉപയോഗിക്കുന്നവരാണെങ്കിൽ, ബാങ്ക് സ്റ്റേറ്റ്മെന്റുകൾ പരിശോധിക്കുക. എന്തെങ്കിലും അസ്വാഭാവികമായ ഇടപാടുകൾ കണ്ടാൽ ഉടൻ തന്നെ ബാങ്കിന്റെ ടോൾ ഫ്രീ നമ്പറിലോ കസ്റ്റമർ കെയറിലോ അറിയിക്കുക.സാങ്കേതികവിദ്യ വളരുന്നതിനൊപ്പം തട്ടിപ്പുകളും വർദ്ധിച്ചുകൊണ്ടിരിക്കുകയാണ്. യെസ് ബാങ്കിലെ സുരക്ഷാ പാളിച്ചകൾ ഇതിനൊരു ഉദാഹരണമാണ്.
വിദേശ യാത്രകൾക്കായി ഫോറെക്സ് കാർഡ് ഉപയോഗിക്കുന്നവർ ബാങ്കിന്റെ മൊബൈൽ ആപ്പ് വഴി നിങ്ങളുടെ കാർഡിലെ 'ഇന്റർനാഷണൽ ഇ-കൊമേഴ്സ്' ഓപ്ഷൻ ആവശ്യമില്ലാത്തപ്പോൾ ഓഫ് ചെയ്തു വയ്ക്കുക. കാർഡിൽ നിന്ന് ഒരു ദിവസം ചിലവാക്കാവുന്ന തുകയ്ക്ക് പരിധി നിശ്ചയിക്കുന്നത് വലിയ തുകകൾ നഷ്ടപ്പെടുന്നത് ഒഴിവാക്കാൻ സഹായിക്കും.
യാത്രയിലായിരിക്കുമ്പോഴും അല്ലാത്തപ്പോഴും കാർഡ് സ്റ്റേറ്റ്മെന്റുകൾ കൃത്യമായി പരിശോധിക്കുക.
ഇടപാടുകൾക്ക് അല്ലാതെ ഒടിപി സന്ദേശങ്ങൾ ഫോണിൽ വരുന്നുണ്ടോ എന്ന് ശ്രദ്ധിക്കുക. എടിഎമ്മുകളിലും മറ്റും കാർഡ് ഉപയോഗിക്കുമ്പോൾ പിൻ നമ്പർ ആരും കാണുന്നില്ലെന്ന് ഉറപ്പുവരുത്തുക. കാർഡിന്റെ പുറകിലുള്ള സിവിവി നമ്പർ ഒരു സ്റ്റിക്കർ ഒട്ടിച്ച് മറച്ചുവെക്കുന്നത് നല്ലതാണ്.
കാർഡ് നഷ്ടപ്പെടുകയോ അസ്വാഭാവികമായ ഇടപാടുകൾ ശ്രദ്ധയിൽപ്പെടുകയോ ചെയ്താൽ ഒട്ടും വൈകാതെ ബാങ്കിന്റെ ടോൾ ഫ്രീ നമ്പറിൽ വിളിച്ച് കാർഡ് ബ്ലോക്ക് ചെയ്യുക. നമ്മുടെ ജാഗ്രത മാത്രമാണ് സൈബർ തട്ടിപ്പുകാരിൽ നിന്ന് പണം സംരക്ഷിക്കാനുള്ള ഏക വഴി.
Content Highlights: Shock for Yes Bank Customers; Crores Lost in Fraud via Foreign Currency Cards